علشان خاطرك يا ختيار
بنعشق الوطن والديار
بدنا نضحك و نفرح
فرحة الاستقلال
ونبشر الختايرة والعجايز والأطفال
بأن الوطن وفلسطين فلسطينا
وما عمرنا بننساها وايش ما صار صار
ولا تحمل هم يا ختيار
بدنا نقمبز ع الطريق
ونغربل القرن اللي مضى
ونشوف مين العدو ومين الصديق
ونقول للغربال
غربل ... غربل
غربل يا غربال
كل اللي مروا
واللي ظلوا
ع البال
ونقيهم يا غربال
من اللي خانوا
واللي أحوجونا للسؤال
غربل يا غربال غربل
واطرد من قلبك هالزيوان
ودير بالك يا غربال
على الحبايب
وامسح دمع
عيونهم
وما تخلي
الفرح يفوتهم
وناديني يا غربال
تلاقيهم
وأُقبل عيونهم
واطفي جمر قلبي
اللي ببعدهم
أشعل النار
ونادي يا غربال
نادي ع القمر
ونجوم السما
وشمس النهار
واشهدوا على
حبي ليهم
ولفلسطين الموال
وللعتابا والميجنا
ولظريف الطول والغِزَيّل
وللدحية والدبكة الفلسطينية
وقول يا غربال
ميل يا غزيل ميل
ميلك ميولة
قيلك قيولة
نعملك فنجان قهوة
وسلطة وتبولة
ميل يا غزيل
نطعميك زيت وزعتر
ونسقيك الشاي بمرمرية
ونام يا ختيار نام
واطمئن مية بالمية
الجنين والجنينة برحم الأم
بتقول
بتقول
بتقول
أنا أنا
أنا فلسطينية
وكل عام وأنتم بألف خير يا فلسطينية ويا كل الشعوب العربية
بقلم: عز الدين حسين أبو صفية
تعليقات القرّاء
التعليقات المنشورة لا تعبر عن رأي الموقع وإنما تعبر عن رأي أصحابها